aloneman

Сэтгэлийг минь сэргээсэн сайхан төрх

Итгэлийг минь бадраасан ялдам ааль

Зоригийг минь хурцалсан ухаант үгс

Жаргалыг минь тэтгэсэн бүсгүйн заяа ... зөвхөн чинийх

 

Сайхан зүйл бүхнийг чамтай адилтгаж харна

Саар үйл бүгдийг чамаасаа холдуулж бодно

Ажил төрөл бүтэмжтэй байвал чиний минь ерөөлөөр гэж баярладаг

Алс хэтийн амьдралаа чамтайгаа хамтаар гэж төсөөлдөг

 

Хөх тэнгэрийн дор хүмүүн заяанд төрсөн болохоор

Хүн хүний дээд эх хүн болсон болохоор

Хайр, халамжийн дээдийг чи хүртэх учиртай

Хамгийн сайхан бүхэн чамайг хүрээлэх ёстой ... Би чамд хайртай

 

Өвдөг сөгдөн гуйя ... Энхрийлж хайрлах эхнэр минь болооч

                                      Элгэндээ тэврэх үрсийн минь эх болооч

Ачаа хармаар байна гэж аав нэхэх юм

Амьд дээрээ өсгөөд өгье гэж ээж шахах юм

Авга эгч болмоор байна гэж дүү нэмэрлэх юм

Авгай аваагүй би юугаа өгөх вэ дээ

 

Нас чинь яваад байна, амьдралаа зохио гэж найзууд загнах юм

Найз бүсгүйтэй болгоноо гэж эхнэрүүд нь зовоох юм

Үеийн хүүхнүүд одоо олдохгүй боллоо шүү гэж дарамтлах юм

Үе мултарсан жаахан охинтой сууна даа чи гэж тавлах юм

 

Хамаатны хэдэн дүү нар бүгд гэр бүлтэй болчихож

Хамгийн ахмад нь хэрнээ би ганцаараа хоцорчихож

Тэднийхээ хүүхдүүдийг хараад битүүхэн атаархах юм

Тэгэж байгаад болно доо гэж өөрийгөө тайвшруулах юм

 

Амьдралдаа би алдаж үзсэн, онож үзсэн

Аз жаргалыг амсаж үзсэн, эдэлж үзсэн

Ариун хайртай учирч үзсэн, ухаарч үзсэн

Аюул бэрхшээлтэй тулгарч үзсэн, туулж үзсэн ...  Бусдаас ялгарах зүйлгүй

 

Аав, ээжийгээ уйлуулж үзлээ, учирлуулж үзлээ

Алдрайхан бүсгүйг гомдоож үзлээ, гэмшүүлж үзлээ

Анд нөхдөө хуурч үзлээ, хууртагдаж үзлээ

Алдар нэр, албан тушаалд хүрч үзлээ, унаж үзлээ ... Зөвхөн миний буруугаас

 

Айх ёстой зүйлээс айдаггүй хүн болж тэнэгтэж үзлээ

Авах ёстой хишгийг авдаггүй хүн болж нэрэлхэж үзлээ

Амьдралдаа огт үзээгүй байж үзчихсэн хүн болж онгирч үзлээ

Ардаа юу ч үгүй хоосон байж өгснийг нь голж цамаархаж үзлээ ... Би мөн дүүрчихсэн хүн шүү

 

Эргээд одоо харахад эргүү ч гэсэн энэ миний маьдрал

Эмх замбараагүй ч гэсэн эгэл хүний амьдрал

Энэ бүх зүйлсийг болох ёстой байсан гээд орхичихоё

Элдэв зүйлд гутралгүй ирээдүйнхээ төлөө зүтгэчихье ...

Хайрласны минь хариуд хайрла гэж би нэхэхгүй

Хажууд минь үргэлж хамт бай гэж би шахахгүй

Хань ижил минь бол гэж би шаналгахгүй

Хардаж, сэрдэж, цагдаж, мөрдөж би зовоохгүй

 

Хийсэн үйлдэд минь баярлалаа гэж бүү хэл

Дахиж хийх гээд даварчихдаг юм би

Хамт байсан мөчүүдийг сайхан байсан гэж бүү дурс

Дандаа тийм байх гээд зүтгэчихдэг юм би

 

Зүгээр л би хажууд чинь оршино, харцанд чинь өртөнө

Зөвхөн би сэтгэлдээ хайрлаж явна, сэмхэн халамжилж амьдарна

 

Хань ижилтэй болно, тэр гарцаагүй

Хамт амьдарч л таараа, тэр маргашгүй

Хайрлаж энхрийлэх л болно, тэр ойлгомжтой

Харин хэнийг вэ?, тэр ...

 

Цаг нь болохоор цааш нь түлхсэн ч наашаа зүтгэдэг

Цаг нь болохоор холдохыг хүссэн ч ойртоод байдаг

Цаг нь болохоор мартахыг хичээсэн ч санагдаад байдаг

Цаг нь болохоор зэвүүцмээр байсан ч энхрийлээд байдаг ... хайрласан сэтгэл ...

 

 

Хөх тэнгэрийн уудамд хөөрч нисэхээсээ өмнө

Хөрст дэлхийн хэвлийд шингэж уусахаасаа өмнө

Хүн болж төрсөн хувь заяагаа дуусахаас өмнө

Хүч чадалтай идэр насаа өнгөрөхөөс өмнө ... чамтай хамт амьдрахсан ...

 

Бодол...

 

Амьдралыг хуурамч гэж хэлэх хүн зөндөө олон бий

Аз жаргал хүн бүрт ирдэггүй гэдэгт итгэдэг хүн бий

Алдар нэр, эд баялагийн боол болсон хүмүүс бий

Амжилт, бүтээл, гайхамшгийн эзэн болсон хүн ч бий

 

Ингэж бодохлоор...

 

Хөнжлийнхөө хэрээр хөлөө жийх шиг зөв юм алга

Хөрөнгө, мөнгөнд шунан дурлаж, гүйх хэрэг алга

Хүүхэд зангаараа тоглон наадах шиг аюулгүй зүйл алга

Хүрч чадах зүйлсээсээ илүүг хүсэх шаардлага алга

 

Харин...

 

Хүнд муу юм хийхгүй мөрөөрөө амьдаръя

Хүний юмнаас хумслахгүй шударгаар ажиллая

Хайрлавал хайрласан шиг хайрлаж сэтгэлээ баясгая

Ханилвал ханилсан шиг ханилж амьдралаа босгоё

 

Атаархана

 

Чиний дээрээс будран орох цасан ширхэгт би атаархана

Чимээгүйхэн чамайг илбэх сэвшээ салхинд би атаархана

Шиврэн орох борооны тунгалаг дусал бүрт би атаархана

Шөнө бүрийг чамтай хамт өнгөрөөх өдөн дэрэнд би атаархана

 

Үзэсгэлэн гоог чинь улам чимэх өмссөн эдлэлд чинь би атаархана

Үдшийн бүрийд замыг чинь гэрэлтүүлдэг мөнгөн саранд би атаархана

Амьдралд чинь аз жаргал бэлэглэдэг алтан наранд би атаархана

Амжиж надаас өмнө чамайг хайрласан аавын хөвгүүдэд би атаархана

 

Баяр цэнгэлээ хуваалцдаг багын найзуудад чинь би атаархана

Бүүвэйн дуу аялахыг чинь сонссон намуун үдшүүдэд би атаархана

Амьсгалах бүрт биед чинь шингэн уусах агаарт би атаархана

Алжаасан үед чинь амрааж өгдөг аягатай кофенд би атаархана

 

Талархана

 

Алаг хорвоод амь, биеэ хувааж төрүүлсэн ачит ижийд тань би талархана

Амар амгалан, халуун сэтгэлээр хайрлаж өсгөсөн аавд тань би талархана

Аз жаргал, амжилт бүтээлээ хуваалцаж өссөн ах нарт тань би талархана

Аюул, осол бүхнээс аварч түүнийг минь хамгаалсан бурханд би талархана

 

Бусдаас илүүгээр хайрлаж, дэмжиж байсан бүх хүмүүст би талархана

Бодол сэтгэлийг нь сонсож, хуваалцаж байсан хүмүүн таньд би талархана

Хазгай гишгэхэд нь түшиж түүнийг минь босгосон ачтанд би талархана

Харанхуй шөнө хаяж явалгүй хань болж байсан халтар нохойд би талархана

 

Эрдмийн их далайгаас харамгүй зааж сургасан багшид тань би талархана

Энх тунх, эсэн мэнд амьдруулж буй эх дэлхийд би талархана

Учруулж биднийг уулзуулсан намрын үдэшд би талархана

Ухааруулж, тайвшруулж өгдөг цаг хугацаанд би талархана

 

Нас, намба чинь хэдтэй байх нь чухал биш

Надтай хамт байхдаа чи эрх бяцхан охин

Эрхлүүлж, энхрийлээд баймаар

Эгдүүтэй хөөрхөн охин

 

Хэн, юу гэж хэлэх нь надад ердөө хамаагүй

Хийсэн, хэлсэн зүйлдээ итгэлтэй байх нь чухал

Хэрэгтэй үед дэргэд нь байж чадвал

Хэнд ч мэдэгдэхгүй, зөвхөн өөртөө сэтгэл хангалуун

 

Чамайг дагуулаад гадуур алхмаар

Чихэр авч өгөөд урамшуулан шагнамаар

Чимээгүйхэн газар ярилцан суумаар

Чихэнд чинь зөөлхөн шивнэмээр

 

Хар халуунд хөлсөө гоожуулан уралдаж гүйсэн ч яадаг юм

Хахир хүйтэнд дааран дааран цасаар тоглосон ч болохгүй юу байхав

Хаврын орой хөтлөлцөөд салхилсан ч яадаг юм

Хамт суугаад намрын үдэш ярилцсан ч буруу нь юу байхав

 

Баярын үдэш

 

Жил бүр ирж л байдаг, өнгөрч л байдаг

Жирийн л нэг өдөр юмсан, уг нь

Тоо нь солигддог болохоор л

Тоймгүй баярладаг бололтой

 

Шинэ жил ирлээ гэнэ, боллоо гэнэ

Шинэ он гарлаа гэнэ, солигдлоо гэнэ

Хийсэн бүтээснээ дүгнэнэ гэнэ, цэгнэнэ гэнэ

Хийх зүйлсээ төлөвлөнө гэнэ, төгөлдөржүүлнэ гэнэ

 

Улс орноороо баярлаж цэнгэдэг сайхан үдэш

Уянгалаг хөгжим эгшиглэсэн намуунхан орой

Шагнал, бэлэг, дурсамж үлдээсэн жаргалтай мөч

Ширээ тойрон суусан миний хайртай хүмүүс

 

Одод гялалзсан өвлийн шөнө сайхан

Оч адил гялтганасан ёслолын буудлага сайхан

Орой дээрээс будран орох цасан ширхэг сайхан

Орчлонд түмэн өнгийн гэрэл цацрах сайхан

 

Оргилуун дарсаа задлан цэнгэх сайхан

Охид бүсгүйчүүд үзэсгэлэнтэй харагдах нь сайхан

Сүрлэг ногоон гацуур мод сайхан

Сүр жавхаатай өвлийн өвгөн сайхан

 

Сайхан бүхнийг бидэнд бэлэглэдэг

Саар бүгдийг ард орхидог

Гуниг, гутарлыг тайтгаруулдаг

Гундсан зүйлсийг сэргээдэг

 

Бидний аз жаргал, амжилт бүтээлийг булаг мэт ундруулах шинэ он ирлээ.

 

ШИНЭ ЖИЛИЙН БАЯРЫН МЭНД ХҮРГЭЕ.

 

Шил шилээ даган урсах бодлын гол намайг зовооно

Шүлэг гэж нэрлэн бодлоо тэрлэж өөрийгөө зогооно

Санасандаа хүрэх гэж тэмүүлэн эр биеэ ядраана

Сайхан амьдралын төлөө хэмээн сэтгэл зүрхээ яаруулна

 

Бодол санаа минь огторгуйд хөвж явна, газардах болоогүй юу

Бодит амьдрал минь огцом өөрчлөгдөж байна, ухаарах бодолгүй юу

Бараан бүхэн ялан дийлэх гээд байна, тэмцэх амьдралгүй юу

Баргар царайлж ганцаар үлдэх гээд байна, сэтгэлийн тэнхээгүй юу.

 

Ялан дийлэх хүсэл ямагт эрсдэл дагуулдаг

Янаг хонгор бүсгүй сэтгэлд мөрөө үлдээдэг

Хамт өнгөрүүлсэн хором бүр дурсамж болдог

Хайрлаж энхрийлсэн мөч бүр жаргал байдаг

 

Мартаж болохгүй зүйл гэж заавал байдаг

Магад тэр нь хайр байдаг

Сэтгэл зүрхнээсээ хайрласан бол

Сэмэрч урагдсан ч харамсах хэрэггүй.

 

Цав цагаахан цас дээрээс будран орно

Цайлган сайхан бодлууд толгойд минь эргэлдэнэ

Сэтгэл санаа минь хөнгөрөөд ер бусын санагдана

Сэргэлэн хонгор түүнийгээ тэвэрч суухыг хүснэ

 

Хархан нүдийг нь ширтэн суулаа

Хамаг бүхнийг мартаж умартлаа

Зөөлхөн уруулыг нь шунан үнслээ

Зөвхөн чамайг хайрлаж жаргалаа

 

Орчлон ертөнц цагаан өнгөөр гэрэлтэнэ

Оюун бодол минь гэгээн хүслээр бялхана

Харсан бүх зүйл хамгийн сайхнаар үзэгдэнэ

Хамгаас азтай хүн би гэж бодогдоно

 

Нэгэн бүсгүй надтай уулзах хүсэлтэй гэнэ

Нилээн удаан сууж ярилцах хэрэгтэй гэнэ

Баяр тэмдэглэсэн болохоор багагүй халамцсан гэнэ

Бодож явдаг зүйлсээ хэлэх зоригтой болсон гэнэ

 

Уулзаж суух газар нь ажлын маань дэргэд гэнэ

Урьтаж намайг очоод хүлээгээд сууж бай гэнэ

Удахгүй оччих болохоор одоо шууд гар гэнэ

Удаж цааргалаад байлгүй хэлснээр минь хий гэнэ

 

Таньдаг болоод арав гаруй жил болсон байх юм

Тухтай суун ярилцаж байснаа ер санахгүй юм

Тааралдвал мэндлээд өнгөрөхөөс хэтэрдэггүй юм

Тулгаж ийнхүү ярихийг нь анх удаагаа сонсох юм

 

Уулзах газраа очоод суулаа, удсан ч үгүй

Улаа бутруулсаар тэр орж ирэв

Хаана байгааг минь харсан ч үгүй

Хажуу талын ширээнд суув

 

Сайн уу гэж би мэндэллээ, цочоочихов түүнийг

Сандарсандаа гараа өргөчихлөө, цохьчихов намайг

Цочсон, цохиулсан хоёр хүн мэнд мэдэлцэж авлаа

Цонхны дэргэдэх ширээнээ ярилцаж суухаар боллоо

 

Ажил, амьдрал, авгай хүүхдийн талаар асууж байна

Аав, ээж, гэр орныг минь сураглаж байна

Бичигдээгүй хууль болсон тоотой хэдэн асуулт

Байдаг л хэдэн үгтэй цомхон хэдэн хариулт

 

Тэвдэж явахад нь тусалсанд баярладаг гэнэ

Төөрч будилахад нь зөвлөсөнд талархдаг гэнэ

Ашдын нэг өдөр ачийг нь заавал хариулна гэнэ

Алдаж онох үед минь аварч намайг гарна гэнэ

 

Ингэж явж байгаадаа өөрөө ч итгэхгүй байгаа гэнэ

Элдвийн зүйл ярихаасаа огтхон ч ичихгүй байна гэнэ

Одоо л хэлж авахгүй бол оройтох гээд байгаа гэнэ

Олдсон ганц боломжоо алдах гээд байна гэнэ

 

Надад сайн болоод удаж байгаа гэнэ

Найзаас илүүгээр бодоод шаналж яваа гэнэ

Надтай гэрлэнэ гэж мөрөөддөг гэнэ

Насных нь хань болно гэдэгт итгэдэг гэнэ

 

Эмэгтэй хүнээр ийм үг хэлүүлсэндээ би ихэд ичлээ

Эргүү, тэнэг хэмээн өөрийгөө зүхлээ

Эвий дээ энэ бүсгүй гэж өрөвдлөө, гэлээ ч

Эгцлэн харж байгаад өөрийн үгийг хэллээ

 

Уучлаарай бүсгүй минь, би чамайг зөвхөн найзаа л гэж боддог

Ухаантай сайхан эмэгтэй, удамт хүний охин гэж хүндэтгэдэг

Урмыг чинь хугалах нь дээ найз нь,  хайрлаж явдаг бүсгүй надад байгаа

Уяхан сэтгэлийг чинь хөглөх ухаалаг залуу чамд заяаж л таараа, уучлаарай.

 

Шаргалтан харагдах намрын өнгө уйтгартай боловч үзэмжтэй

Шинэхэн танилцсан тэрний төрх гунигтай боловч үзэсгэлэнтэй

Гялтганан урсах голын ус тунгалаг боловч ширүүхэн

Гэрэлтэн харагдах түүний сэтгэл уяхан боловч эмзэгхэн

 

                   *************************

 

Хурмастын элчээс би хувь заяагаараа илүү

Худлаа гэвэл асуу, хувилгаан гэгддэг хүмүүсээс

Хүн болж төрсөн учраас би хорвоогийн азтай нэгэн

Хүмүүний хайрыг хүртсэн учраас би орчлонгийн хишигтэй нэгэн

 

                   *************************

 

Орж, гарч байдаг онгод ...

Олонд танигдсан бүтээл ...

Шавхагдашгүй их авъяас ...

Шагнал авсан шүлэг ... надад байхгүй ээ

 

Гэхдээ

 

Бодож, тунгаах цаг ...

Босож, суух зав ...

Хийж, бүтээх ажил ...

Хайрлаж явдаг бүсгүй ... надад байна аа.

 

 

Наашаа харан тэр минь инээмсэглэн зогсоно, наран адил гэрэлтэй...

Насны минь хань гэж намайг дуудна, хөгжим адил эгшиглэнтэй...

Гараас минь хөтлөн хамтдаа алхана, хүүхэд шиг баясгалантай...

Ганцхан үнсүүлчихээд ичингүйрч харна, над шиг жаргалтай...

 

Аав ээжийнхээ амь нь болсон би - айлын ганц хүү

Алдрайхан дүүдээ нөмөр нь болсон би - ачит ганц ах

Амраг хайрт бүсгүйдээ түшиг нь болсон би - итгэлт ганц хань

Айл гэрийн тулгуур багана нь болсон би - алдах эрхгүй ганц хүн

 

Хаврын хавсарганд ганцааранг нь алхуулахгүй байхсан

Хажууд нь нөмөр болоод чичирч зогсохсон

Харанхуй шөнө түүнийгээ тайван амгалан нойрсуулахсан

Хар дарах үед нь зөөлхөн үнсээд унтуулахсан

 

Нүдээ халхлан унжсан хархан үсийг нь илбэхсэн

Насаараа дэргэд нь байж энхрийлэн эрхлүүлэхсэн

Алаг хөөрхөн үрстэйгээ хөгжилдөн шуугиж тоглохсон

Амраг жаахан түүнийгээ насан туршид нь жаргаахсан

 

Намуун зөөлөн хоолойд нь уяран баясаж явахсан

Намбалаг ялдам төрхөнд нь сэтгэлийн цэнгэл эдлэхсэн

Тунгалаг хархан нүдийг нь ширтэн сууж жаргахсан

Тансаг сайхан үнэрт нь тайвширч дандаа унтахсан

 

Хүсэл мөрөөдөл бүхнийг нь биелүүлж өгөхсөн

Хүний сайхан орчлонд сэтгэл хангалуун амьдруулахсан

Хоёр гар дээрээ өргөөд хорвоо дэлхийгээр аялуулахсан

Хайртай эхнэрээ болгоод тоонондоо хадагаа уяахсан

 

Нэгэн сайхан бүсгүйд сэтэл алдарчихаад энэхүү шүлгийг бичиж байсан юм. Гэхдээ энэ шүлгээ түүндээ үзүүлээгүй ээ.

 

Миний дурлал

 

 Нэг алдана, хоёр алдана, гэхдээ гурав дахь гэж байхгүй

Найзлана, нөхөрлөнө, үерхэнэ гэхдээ суух албагүй

Эр хүн алддаг, эрэг нурдаг, гэхдээ заавал биш

Энхрийлдэг, эрхлүүлдэг, хайрладаг, гэхдээ мөнх биш

 

Бүсгүй хүн байхгүй бол ...

Бүлээн цус минь урсахгүй бол ...

Хайрыг мэдрэхгүй бол ...

Хаашаа явахаа мэдэхгүй бол ... амьдралд утга алга

 

Тэмүүлэх тусам холдох нь ...

Тэвчих тусам хэтрэх нь ...

Хүсэх тусам хясах нь ...

Хайрлах тусам зугтах нь ... харамсмаар

 

Бодсон санаснаа ойлгуулж чадахгүй байх ...

Болж бүтэхгүйд нь тусалж чадахгүй байх ...

Хүсэж буйгаа хэлж зүрхлэхгүй байх ...

Хайрлаж чадахаа итгүүлж дийлэхгүй байх ... гутармаар

 

Хань минь болоогүй ч гэсэн уулзаж байгаад нь ...

Хамт байхгүй ч гэсэн харагдаж байгаад нь ...

Намайг хүн гэж тоож байгаад нь ...

Найз минь гэж хэлж байгаад нь ... баярламаар

 

Хамт амьдардаг, тусдаа амьдардаг ...

Хашгирч орилдог, хардаж сэрддэг ...

Нэг нь хайртай, нөгөө нь хайргүй ...

Насан туршдаа ойлголцож чаддаггүй ... хүмүүс олон

 

Үнсэхийг хүсдэг уруул минь хортой гэнэ ...

Үйл хөдлөл нь зөрүүд гэнэ ...

Бодол сэтгэлийг минь уймруулдаг гэнэ ...

Бие, сэтгэл нь хэзээ ч минийх болохгүй гэнэ ... гэсэн ч би хүснэ

 

Дурласан сэтгэлээ нууж явах ...

Дуугүйхэн орхиод явах ...

Үнсэхийг хүсэвч чадахгүй явах ...

Үүрд хамт байхыг мөрөөдөвч бүтэхгүй явах ... хэцүү

 

Аз жаргалыг хол гэж бодвол ...

Амьдралыг хатуу гэж гомдвол ...

Алдаагаа засагдахгүй гэж цөхөрвөл ...

Ахиж дурлахгүй гэж сэтгэлээ түгжвэл ... буруу

 

Сайхан болно гэдэгт итгэ ...

Сайн сайхны төлөө зүтгэ ...

Өөдрөг бүхнийг сэтгэ ...

Өөрийн дураар жарга ... амьдрах сайхан

Цэгцэрч амжаагүй сэтгэлийг нь үймрүүлчихвий гэсэндээ

Цээжин дэх хайрын үгсээ хэлж чадахгүй юм

Эдгэж гүйцээгүй зүрхэн дэх шархыг нь сэдрээчихвий гэсэндээ

Эхнэр минь болооч гэж гуйж зүрхлэхгүй юм

 

Хар толгойнхоо жаргалыг бодоод

Хайртай гээд одоо хэлчихвэл

Сэтгэлд нь бас нэгэн дарамт болоод

Сэвгүй түүнийгээ зовоочих юм болов уу

 

Өмнөх амьдрал, өнгөрүүлсэн түүх чинь хамаагүй ээ

Өөрөө чи минь харамсахгүй байвал л хангалттай

Намайг өрөвдөж, урмыг минь бодож сэтгэлээ шаналгах хэрэггүй ээ

Найз минь гэж бодож явахад л хангалттай

 

Цайлган цагаан чиний минь сэтгэлийн шаналлыг

Цаг хугацаа аяндаа эдгээнэ

Амар амгалан болж, тайвшрах тэрхүү мөчид чинь

Амраг хайрт гэргий минь болооч гэж чамаасаа би гуйх болно